Oʻzbekistonda vaksinatsiya tadbirlari uchun 3 mingdan ziyod emlash punktlari tashkil etiladi

11:43 26 Fevral 2021 Jamiyat
754 0

21–27-fevral kunlari aholini emlash jarayoniga jalb etiladigan tibbiyot xodimlari koronavirusga qarshi emlash boʻyicha qayta va toʻliq tayyorgarlikdan oʻtkaziladi. Bu haqda innovatsion rivojlanish vazirining birinchi oʻrinbosari Shahlo Turdiqulova maʼlum qildi.

Qayd etilishicha, ayni paytda emlanishi zarur boʻlgan shaxslarning elektron roʻyxatini shakllantirish, 3 ming 138 ta emlash punkti, 862 ta harakatdagi va mobil brigada faoliyatini yoʻlga qoʻyish ishlari olib borilyapti. Bitta markaziy, oʻn toʻrtta hududiy hamda 206 ta tuman (shahar) vaksina saqlash joyi mavjud boʻlib, ulardagi 457 ta sovitkich, 148 ta elektr generatori, 121 ta termosumka va termokonteynerlar shay holatga keltirildi.

“Bundan tashqari, aholini koronavirusga qarshi emlashga talab yuqori boʻlgan taqdirda, hududlardagi sport inshootlari yoki boshqa binolar, hozir konservatsiya qilingan taqsimlash va saralash markazlarida vaksinatsiya tadbirlarini ommaviy tashkil etish rejalashtirilgan. «Sovuqlik zanjiri” tizimini saqlagan holda vaksinalarni hududlar orqali tashish uchun mamlakatimizga oʻn yettita avtorefrijerator va ikki yuz oltita mini-avtorefrijerator keltirildi.

Jahon sogʻliqni saqlash tashkilotining Yevropa hududiy byurosi hamkorligida shu yilning 21–27-fevral kunlari aholini emlash jarayoniga jalb etiladigan tibbiyot xodimlari koronavirusga qarshi emlash boʻyicha qayta va toʻliq tayyorgarlikdan oʻtkaziladi», deya maʼlum qilgan Shahlo Turdiqulova.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?