Avvalroq, Oʻzbekistonda “AQLVOY”  telekanali ish boshlagani haqida xabar bergan edik.

Ushbu kanalning ish boshlashiga bagʻishlangan matbuot anjumanida telekanalning kontenti, auditoriyasi, muassislar haqida ham soʻz bordi. Xususan, telekanalning “egasi” Maktabgacha taʼlim vazirligi huzurida Axborot va pedagogik texnologiyalar innovatsion markazidir.

 «Bogʻchalarda mavzular fasllarga moslashtirilgan. Telekanalimiz ham xuddi shu tartibda ishlaydi. Yaʼni, har bitta ishlab chiqarilayotgan kontent taqrizdan oʻtadi. Bizda ekspertlar guruhi tashkil etiladi. Ular har bitta ishlab chiqarilgan kontentni avval taqrizdan oʻtkazadi, keyin efirga qoʻyamiz.

Maktabgacha taʼlim vazirligi huzurida Axborot va pedagogik texnologiyalar innovatsion markazi bor. Hukumatning tegishli qarori bilan belgilab qoʻyildi. Ushbu innovatsion markaz ushbu telekanal taʼsischisi. Taʼsischi deganda oddiy qilib, agar tushunishingiz uchun aytganda, telekanalning egasi degan tushunchani beradi. Yaʼni nafaqat kanal ish faoliyatini olib borishida qoʻllab-quvvatlaymiz. Balki ishlab chiqarilayotgan kontent, efirga ketayotgan kontentni ham nazorat qilamiz», deydi Axborot va pedagogik texnologiyalar innovatsion markazi direktori Oyatillo Rahmatillayev.

Anjumanda maʼlum qilinishicha, telekanal Rossiya, AQSH, Janubiy Koreya, Xitoy kabi oʻnlab mamlakatlarda taniqli jahon studiyalari tomonidan yaratilgan eng yaxshi animatsion seriallar va dasturlarni namoyish etib boradi. Bu esa bir necha jurnalistlarning “Nega milliy mutfilmlar suratga olinmaydi”, eʼtirozlariga sabab boʻldi. Shu kabi savollar, eʼtirozlar va takliflarga Oyatillo Rahmatillayev javob berdi.

“Multiplikatsion kontentni ishlab chiqarish juda ham katta moliyaviy sarf xarajatlarni talab qiladi. Masalan bitta illyustratsiya, deylik bitta rasm ishlab chiqarish uchun ham katta mablagʻ kerak. Birinchi bosqichda telekanal oʻzini faoliyatini boshlab, moliyaviy barqarorlikka erishganidan keyin olinadi. Oʻzbekistonda milliy qahramonlarimiz juda ham yaxshi rivojlanmagan. Ularni sifati kam. Milliy qahramonimiz kim desa, oʻzimiz ham oʻylanib qolamiz. Hozir bizni asosiy maqsadimiz mana shu milliy qahramonimizni yaratish, ularni multfilmlari, multseriallari yoki boshqa koʻrsatuvlari, teleeshittirishlarda mana shu yaratilgan milliy qahramonlarni ishtirokini taʼminlash”, deydi Oyatillo Rahmatillayev.

Maʼlumot uchun, kanal kontenti quyidagilar moʻljallangan:

• maʼlumotni qiziqarli va tushunarli shaklda taqdim etish orqali bolalarning bilim olish faolligini ragʻbatlantirish, intellektual va ijodiy koʻnikmalarini rivojlantirish (edutainment);
• Telekoʻrsatuvlarni tashkil qilish tizimida zamonaviy texnik yechimlar va ilgʻor xorijiy tajribani tatbiq etish, raqamli va multimedia texnologiyalarini rivojlantirish;
• bolalar telekoʻrsatuvlari infratuzilmasini kengaytirish, milliy maʼnaviyat, madaniy – ahloqiy anʼanalar va zamonaviy innovatsiyalar uygʻunlashgan, bilim beruvchi va koʻngilochar kontent rivojlanishini ragʻbatlantirish;
• Oʻzbekiston Respublikasida tasdiqlangan talablar, standartlar va oʻquv - taʼlim dasturlariga muvofiq; bolalarning yosh xususiyatlaridan kelib chiqqan holda taʼlim beruvchi, rivojlantiruvchi va oʻyin elementlarini oʻzida mujassam etgan telekoʻrsatuvlar va multimedia kontentini yaratish;
• bolalarda Vatanga muhabbat tuygʻusini shakllantirish, ularni jonajon oʻlka madaniyati va tarixi, qadriyatlari, anʼana va urf-odatlari bilan tanishtirish;
• bolalarda kreativ – ijodiy fikrlashni rivojlantirish hamda ularda badiiy va estetik didni tarbiyalash;
• bolalarda sogʻlom turmush tarziga oid bilimlarni shakllantirish, sport bilan shugʻullanishga qiziqishni oshirish, zarur sanitar-gigiyenik koʻnikmalarini shakllantirish, ularni xavfsizlik qoidalariga qatʼiy rioya etishga oʻrgatish.

Shaxnoza TOʻRAMURODOVA,

“Xalq soʻzi”