Qirgʻiz Respublikasi Xavfsizlik kengashi kotibi Marat Imonqulov boshchiligidagi delegatsiyaning mamlakatimizga tashrifi doirasida Toshkentda tashkil etilgan Oʻzbekiston Respublikasi Prezidenti huzuridagi Xavfsizlik kengashi apparati va Qirgʻiz Respublikasi Xavfsizlik kengashi kotibiyati oʻrtasidagi maslahatlashuvning ikkinchi davrasi nihoyasiga yetdi.

Maslahatlashuv chogʻida xalqaro terror, ekstremizm, transmilliy uyushgan jinoyatchilik, giyohvand moddalar noqonuniy aylanmasi singari mintaqaviy xavfsizlik bilan bogʻliq tahdid, xavf-xatarlarga qarshi kurash boʻyicha hamkorlikni yanada rivojlantirish masalalari muhokama qilindi.

Tomonlar konstruktiv hamkorlikni bundan keyin ham qoʻllab-quvvatlashga sodiqligini, xavfsizlik sohasidagi Oʻzbekiston-Qirgʻiziston sherikligini, jumladan, shartnomaviy-huquqiy bazani mustahkamlash, birgalikdagi amaliy saʼy-harakatlar mexanizmini muvofiqlashtirish orqali rivojlantirishga qatʼiy tayyor ekanligini tasdiqladilar.

Uchrashuv yakunida xavfsizlikni taʼminlash sohasidagi hamkorlikni yanada kengaytirish va chuqurlashtirishga qaratilgan aniq yoʻnalishlar, chora-tadbirlar belgilangan Maslahatlashuv Protokoli imzolandi.