Rossiya shaxmat federatsiyasi rahbariyati shaxmat bo‘yicha brayl alifbosidagi o‘quv qo‘llanmalarini O‘zbekiston shaxmat federatsiyasiga taqdim etdi.
Bu haqda Turizm va sport vazirligi maʼlum qilindi. Mazkur vazirlikda gibrid shaxmat bo‘yicha Osiyo chempioni Shamsiddin Vohidov O‘zbekiston Respublikasi Bosh vazirining o‘rinbosari — O‘zbekiston shaxmat federatsiyasi raisi Аziz Аbduhakimov tomonidan taqdirlandi.
Shu munosabat bilan o‘tkazilgan tadbirda so‘z olgan А. Аbduhakimov bugungi kunda mamlakatimizda jismoniy tarbiya va sportga berilayotgan eʼtiborga alohida to‘xtalib, endilikda sport turlari bo‘yicha federatsiya va assotsiatsiyalar para sportni rivojlantirishga ham jiddiy eʼtibor qaratishi davr talabi ekanligini taʼkidladi. Bunda Prezidentimizning “Paralimpiya harakatini rivojlantirishga doir qo‘shimcha chora-tadbirlar to‘gʼrisida”gi qarori muhim dasturulamal bo‘lib xizmat qilishi aytib o‘tildi.
Tadbir doirasida Vladimir Barskiyning “Shaxmat maktabi” kitoblari jamlanmasi O‘zbekiston shaxmat federatsiyasi jamoasiga taqdim etildi. 
Endigi vazifa esa — O‘zbekistonda para shaxmatni ommalashtirish, nogironligi bo‘lgan yurtdoshlarimizni faol hayot tarziga jalb etishdir.