2022-yil 24-oktyabr kuni Oʻzbekiston delegatsiyasining YEXHT PA kuzgi sessiyasidagi ishtiroki doirasida Senatning Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qoʻmitasi raisi R. Alimovning Polsha Senati vitse-marshali (vitse-spikeri) M. Kaminskiy bilan uchrashuvi boʻlib oʻtdi.

Tomonlar ikki tomonlama munosabatlarni, shu jumladan, parlamentlararo hamkorlikni va xalqaro parlamentlararo tashkilotlar doirasidagi oʻzaro aloqalarni rivojlantirish istiqbollarini muhokama qildi.

Oʻzbekiston tomoni mamlakatimizda amalga oshirilayotgan islohotlar haqida maʼlumot berdi, savdo-iqtisodiy va mintaqalararo hamkorlikni rivojlantirish sohasida hali foydalanilmagan katta salohiyat mavjudligini taʼkidladi.

Oʻz navbatida, M.Kaminskiy Oʻzbekistonga Polsha investitsiyalarini jalb qilishda har tomonlama koʻmaklashishga tayyorligini bildirdi, Polsha mehnat migratsiyasi sohasida hamkorlikni yoʻlga qoʻyishdan manfaatdor ekanini taʼkidladi. U Polsha parlamenti aʼzolari Polsha-Oʻzbekiston koʻp qirrali hamkorlikni jadal rivojlantirish va mustahkamlashni har tomonlama qoʻllab-quvvatlashiga hamda Oʻzbekiston delegatsiyasining YEXHT PA tadbirlarida faol ishtirok etishiga ishontirdi.

Uchrashuv yakunlari boʻyicha yaqin vaqt ichida “Oʻzbekiston – Polsha” parlamentlararo doʻstlik guruhining navbatdagi majlisini tashkil etishga kelishib olindi.

Uchrashuvda, shuningdek, Seym deputati, “Polsha – Oʻzbekiston” parlamentlararo doʻstlik guruhi rahbari P.Beyda, Oʻzbekistonning Polshadagi Elchisi B.Babayev ham ishtirok etdi.