Yaqinda Oʻzbekiston kasaba uyushmalari federatsiyasida Madaniyat, sport va turizm xodimlari kasaba uyushmasi Respublika kengashi hamda mazkur sohaga aloqador vazirliklar, jamoat tashkilotlari hamda ijodiy uyushmalar oʻrtasida Tarmoq kelishuvlarini imzolashga bagʻishlangan tadbir oʻtkazildi.

Unda Oʻzbekiston Respublikasi Jismoniy tarbiya va sport vazirligi, Madaniyat vazirligi, Turizmni rivojlantirish davlat qoʻmitasi, “Oʻzbekkino” davlat unitar korxonasi, Badiiy akademiya rahbarlari va mutasaddilari, tarmoq kasaba uyushmasi faollari, madaniyat, sport va sanʼat sohasi namoyondalari va faxriylari qatnashdilar. Tadbirda Jismoniy tarbiya va sport vazirining birinchi oʻrinbosari Ravshan Ermatov ham ishtirok etdi.

Soʻnggi yillarda davlatimiz rahbari Shavkat Mirziyoyev tashabbuslari bilan mamlakatimizda barcha sohalarda boʻlganidek, madaniyat, sport va turizm sohalarida ham izchil islohotlar olib borilmoqda. Mazkur jarayonlarda kasaba uyushmalari faolligini oshirish, madaniyat, sport va turizm sohasida mehnat qilayotgan xodimlar ijtimoiy himoyasini kuchaytirish maqsadida 2020-yil sentyabr oyida Oʻzbekiston Madaniyat, sport va turizm xodimlari kasaba uyushmasi Respublika Kengashi tashkil etilgan edi.

Qisqa vaqt ichida mazkur tarmoq kasaba uyushmasi oʻz safiga 1 173 ta boshlangʻich tashkilotni hamda tarmoq tashkilot va muassasalarida mehnat qilayotgan 91 ming 329 nafar madaniyat, sport va turizm sohalari xodimlarini birlashtirishga muvaffaq boʻldi.

Hamkorlik aloqalarining natijasi oʻlaroq, bugungi tadbirda tarmoqni ijtimoiy-iqtisodiy rivojlantirishning asosiy yoʻnalishlari, mehnat shartlari va unga haq toʻlash, tarmoq xodimlarining ijtimoiy kafolatlarini belgilab beruvchi Tarmoq kelishuvlari imzolanishiga erishildi.

Taʼkidlash joiz, qabul qilingan tarmoq kelishuvlariga madaniyat, kino va tasviriy sanʼat tizimida faoliyat olib borayotgan xodimlarni ragʻbatlantirib borish, sohaga malakali mutaxassislarni jalb etish maqsadida mehnatga haq toʻlash tizimini qayta koʻrib chiqish, xodimlarga uy-joy sotib olish uchun imtiyozli kreditlar ajratilishiga koʻmaklashish, soha vakillarining xalqaro loyihalardagi ishtirokini taʼminlash orqali tajriba almashish tizimini yoʻlga qoʻyish kabi dolzarb masalalar kiritilgan.

Shuningdek, Tarmoq kelishuvlariga kino sanoati, nomoddiy madaniy merosimizning ajralmas qismi boʻlgan xalq ijodiyoti, tasviriy sanʼat yoʻnalishlaridagi eng yorqin asarlarni xalqaro arenalarga olib chiqish tizimini joriy etish, har yili turizm sohasida ilgʻor natijalarga erishgan xodimlarga hordiq chiqarishi, sogʻligʻini tiklashi uchun kasaba uyushmalari sihatgohlariga imtiyozli yoʻllanmalar ajratish, madaniyat va sanʼat sohasi xodimlari uchun sogʻlomlashtirish markazini tashkil etish, madaniyat va sanʼat yoʻnalishidagi oliygohlar talabalarining xorijiy davlatlardagi nufuzli oliy oʻquv yurtlarida oʻquv amaliyotini oʻtishlariga erishish kabi masalalar kiritilgan.

Bundan tashqari, umidli va iqtidorli yoshlarni otaliqqa olish, ularning dunyo sahnasiga chiqishiga birgalikda koʻmak berish, oʻquv yili davomida muvaffaqiyatlarga erishgan eng iqtidorli va ijtimoiy-iqtisodiy koʻmakka muhtoj talabalar uchun “Oʻzbekiston madaniyat, sport va turizm xodimlari kasaba uyushmasi stipendiyasi”ni joriy etish yoʻnalishlaridagi ishlarni amalga oshirishga ham kelishib olindi.

Tarmoq kasaba uyushmasi va tegishli vazirlik hamda tashkilotlar oʻrtasida imzolangan Tarmoq kelishuvlarining yana bir ahamiyatli jihati shundaki, ularda koʻp yillar mobaynida mehnat qilib, xalq eʼtiborini qozongan, yurtimiz madaniyati va sanʼati rivojiga ulkan hissa qoʻshgan ustoz va faxriylarga eʼtiborni kuchaytirish, gʻamxoʻrlik va eʼzoz koʻrsatish masalalari ham oʻz aksini topgan. Xususan, tarmoq kelishuvlariga muvofiq volontyorlarni jalb etgan holda yakka-yolgʻiz yurtdoshlarimiz holidan xabar olish, tugʻilgan kun va kasb bayramlarida faxriylarni munosib taqdirlash, ular hayotidagi ijtimoiy-maishiy muammolarni hal etishda koʻmaklashish, tarixiy shaharlarga sayohatlar uyushtirish maqsadida “Faxriylar poyezdlari”ni tashkil etish shular jumlasidan.

Jismoniy tarbiya va sport sohasida esa Xalqaro marafonlar, xalqaro ekomarafonlar, avtoralli va motokross sport musobaqalarini tizimli oʻtkazish orqali sport turizmini rivojlantirish, qishki Olimpiya sport turlari infratuzilmasini yaratish, ushbu sport turlarini ommalashtirish, milliy sport turlarini rivojlantirish va ommaviyligini oshirish, ularni Osiyo va Olimpiya oʻyinlari dasturlariga kiritish boʻyicha tizimli chora-tadbirlarni amalga oshirish, milliy sport turlarini chet ellarga keng targʻib qilish va tanitish maqsadida har bir hududda tomoshabop sport oʻyinlar tashkil etib, sayyohlarni oʻyinlarga jalb qilish kabi vazifalar belgilangan.