Mirzo Ulugʻbek nomidagi Oʻzbekiston Milliy universiteti huzurida 2018-yilda Qozon Federal universiteti bilan hamkorlikda tashkil qilingan Oʻzbek-Qozon qoʻshma taʼlim dasturining “Geodeziya va geoinformatika” yoʻnalishida tahsil olgan ilk bitiruvchilarga diplom topshirish tadbiri boʻlib oʻtdi.

Tadbirda OʻzMU va QFU rahbarlari, olimlar va bitiruvchi yoshlar, shuningdek, ish beruvchi tashkilotlar vakillari ishtirok etdi.

Tadbirni OʻzMU rektori Inomjon Majidov ochib berib, bitiruvchilarni ikki tomonlama qoʻshma taʼlim dasturni muvaffaqiyatli tamomlaganlari bilan tabrikladi. Shuningdek, yosh kadrlarning bundan keyingi faoliyatlariga muvaffaqiyatlar tilab, OʻzMU xalqaro eʼtirof etilgan QS World University Rankingsning Sharqiy Yevropa va Markaziy Osiyo – EECA mintaqaviy reytingida 251-400 oʻrinlarga chiqqanini alohida taʼkidlab oʻtdi.

Shundan soʻng Qozon Federal universiteti (QFU) Boshqaruv, iqtisodiyot va moliya instituti direktori Nailya Bagautdinova soʻzga chiqib, bitiruvchilarni samimiy qutladi. Tadbir yakunida OʻzMU rektori Inom Majidov va QFU Boshqaruv, iqtisodiyot va moliya instituti direktori Nailya Bagautdinova bitiruvchi yosh kadrlarga ikki tomonlama diplomlarni topshirdilar.