Oʻzbek dzyudosi afsonasi voyaga yetgan mahallada zamonaviy maktab  foydalanishga topshirildi

19:30 29 Dekabr 2021 Jamiyat
1236 0

Foto: "Xalq so'zi"

2010-yilda dzyudo boʻyicha Tokioda, 2011-yilda Parijda boʻlib oʻtgan  jahon chempionatlari gʻolibi, “Oʻzbek dzyudosi afsonasi” deya taʼriflangan Rishod Sobirov oʻsib-ulgʻaygan Buxoro viloyati Jondor tumanidagi “Pahlavon” mahalla fuqarolar yigʻinida 16-umumtaʼlim maktabining yangi binosi foydalanishga topshirildi.

Mazkur maktabning avvalgi binosi bundan 49 yil muqaddam qurilgan boʻlib, 520 oʻquvchi oʻrniga moʻljallangan edi. Shu kunga qadar esa maskanda 800 nafardan ziyod oʻgʻil-qizlar ikki smenada tahsil olib kelayotgandi. Boz ustiga bilim dargohining 270 oʻquvchiga moʻljallangan oʻquv korpusi  taʼmirtalab ahvolga kelib qolgan edi.

Investitsiya dasturiga muvofiq, bu yerda 6 milliard 551 million soʻmlik qurilish-taʼmirlash yumushlari amalga oshirildi. Natijada 660 oʻrinli yangi bino qad rostladi. Shunday qilib mahalla hududidagi Boʻribogʻi, Qaroli, Xorsafed qishloqlari aholisi farzandlari zamonaviy shart-sharoitlarda bilim olishi va sport bilan muntazam shugʻullanish imkoniyatiga ega boʻldilar. Binobarin, “Pahlavon”dan jahon chempioniga munosib izdoshlar yetishib chiqsa ajab emas.

Istam IBROHIMOV, “Xalq soʻzi”.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?