Hukumat qarori (517-son, 26.08.2020-y.) bilan Respublika oliy taʼlim muassasalarining professor-oʻqituvchilari va boshqa toifadagi xodimlarini byudjetdan tashqari mablagʻlar hisobidan moddiy ragʻbatlantirish tartibi toʻgʻrisidagi nizom tasdiqlandi. Bu haqda “Huquqiy axborot” kanali xabar berdi.

Nizomga muvofiq, pul mukofotlari, ustamalar va qoʻshimcha haqlar miqdori har bir xodimning OTM faoliyati samaradorligiga qoʻshgan shaxsiy hissasiga qarab belgilanadi.

OTM har yili professor-oʻqituvchi va xodimlar tomonidan bajarilgan ishlarining samaradorligi va sifatiga qarab moddiy ragʻbatlantirish tartibi va hajmlarini belgilashi shart.

Moddiy ragʻbatlantirish nafaqat bir xodim uchun, balki jamoatchilik ishlarini bajargan butun bir jamoa, kafedra, fakultet, ilmiy laboratoriya va boshqa boʻlinmalar xodimlariga ham berilishi mumkin.

Nizomga koʻra, toʻlov-kontrakt asosida oʻqitishdan tushadigan mablagʻning 30 foizdan koʻp boʻlmagan qismi taʼlim muassasasi xodimlarini moddiy ragʻbatlantirishga sarflanishi mumkin.

Nizom bilan OTM professor-oʻqituvchi va boshqa toifadagi xodimlarini ragʻbatlantirishning asosiy mezonlari belgilandi.