Temur ESHBOYEV/“Xalq soʻzi”. Samarqand shahridagi Oʻzbekiston va Qirgʻiziston oliy taʼlim muassasalari rektorlarining ikkinchi forumi doirasida Navoiy Davlat pedagogika instituti va Oʻsh davlat universiteti oʻrtasida hamkorlik memorandumi imzolandi.

— Hamkorlik memorandumiga asosan, endilikda oliygohlarimiz oʻrtasida professor-oʻqituvchilar hamda talabalar almashinuvi yoʻlga qoʻyiladi. Ilmiy tadqiqotchilar amaliyoti tashkil qilinib, ilmiy loyihalar, simpoziumlar, anjumanlar oʻtkaziladi, — deydi Navoiy Davlat pedagogika instituti rektori Muhiddin Kalonov. — Ushbu hamkorlik oliy taʼlim muassasalari oʻrtasida bilim va taʼlim almashishga xizmat qilib, ikki mamlakat uchun madaniy aloqalar yuksalishida munosib oʻrin tutadi.

Maʼlumot oʻrnida, Oʻsh davlat universitetida bugun 72 ta mutaxassislik boʻyicha 28 mingdan ortiq talaba tahsil olmoqda. Universitetda 15 ta fakultet, 3 ta oʻquv instituti, 3 ta kollej, 2 ta litsey, 1 ta bolalar bogʻchasi, aspirantura, ordinatura va magistratura boʻlimlari mavjud. U 21 ta oʻquv binosi, 8 ta talabalar turar joyi, 2 ta tibbiyot poliklinikasi, 7 ta klinik baza, xorijlik mutaxassislar uchun mehmonxona, 5 ta dam olish maskani va Issiqkoʻl sohilidagi pansionatga ega. Albatta, mazkur salohiyat va hamkorlik universitet maqomiga ega boʻlishga hozirlik koʻrayotgan Navoiy Davlat pedagogika instituti uchun muhim ahamiyatga ega.