Oʻquvchini ishlatishdan uyalish kerak

11:50 17 Iyun 2021 Jamiyat
560 0

Samarqand viloyatining Jomboy tumanidagi 28-maktabning 7−11-sinf oʻquvchilaridan ayrimlari oʻz sinfxonalarini taʼmirlash ishlariga jalb qilingani haqida ijtimoiy tarmoqlarda tarqalgan va muhokamalarga sabab boʻlgan holat yuzasidan Samarqand viloyati Xalq taʼlimi boshqarmasi axborot xizmatining “silliqqina” munosabati eʼlon qilindi.

Munosabatda oʻquvchilar maktabni taʼmirlash ishlariga yordam berish uchun ota-onalarining roziligi bilan kelganligi, qisqasi, ular ixtiyorlariga zid ravishda taʼmirlash ishlariga jalb qilinmagani maʼlum qilingan. Holat garchi shu tarzda izohlangan boʻlsada, bu qonunbuzarlik, voyaga yetmaganlarni majburiy mehnatga jalb etish hisoblanadi.

Toʻgʻri, bolalarni mehnatga, jamoat ishlarida faol boʻlishga oʻrgatish kerak. Bu ularning kelajagiga ham ijobiy taʼsir koʻrsatadi. Lekin ular bajarayotgan ishlar yoshiga, jismoniy imkoniyatlariga mos kelishi, sogʻligiga taʼsir koʻrsatmasligi kerak. Qolaversa, oʻquvchilardan ayrimlarining maktabda ishlab, boshqalari bunday ishlarda ishtirok etmasligi, ular oʻrtasida turli tushunmovchiliklarga sabab boʻladi.

Keyingi paytda maktablarda shunga oʻxshash boshqa holatlar uchrab turgani haqida ham ijtimoiy tarmoqlarda chiqishlar boʻldi. Bizningcha, taʼlim mutasaddilari, maktab maʼmuriyati yuqoridagi kabi holatlar takrorlanishiga yoʻl qoʻymasligi kerak. Maktab — taʼlim, tarbiya oʻchogʻi boʻlib kelgan va shunday boʻlib qolishi lozim.

Dilshod Islomov,
OʻzXDP Markaziy Kengashi xodimi.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?

Ko‘p o‘qilganlar

Yangiliklar taqvimi

Кластер