“Favqulodda vaziyatlardan jabr koʻrgan fuqarolarni ijtimoiy himoya qilishning qoʻshimcha choralari toʻgʻrisida”gi Prezident qarori qabul qilindi.

Qarorga muvofiq, 2021-yil 1-yanvardan Oʻzbekiston va xorijiy davlatda tabiiy va texnogen xususiyatli favqulodda vaziyatlar, shu jumladan maishiy tusdagi ofatlar (ofatlar) yuz berganligi oqibatida jismoniy shaxslarning aybisiz yoʻqotilgan yoki yaroqsiz holga kelgan hujjatlarni tiklashda ular davlat boji va yigʻimlardan ozod qilinadi.

Ofatlar yuz berganligini tasdiqlash, zarurat boʻlganda, hujjatni tiklash vakolati boʻlgan davlat organining soʻroviga asosan:

Oʻzbekiston hududida – Favqulodda vaziyatlar vazirligi tomonidan beriladigan maʼlumotnoma asosida;

Xorijiy davlatlar hududida – xorijiy davlat vakolatli idoralari tomonidan berilgan va legallashtirilgan yoki apostil qoʻyilgan yoxud xalqaro shartnomalarga muvofiq rasmiylashtirilgan maʼlumotnoma asosida amalga oshiriladi.

Oʻzbekiston hududida ofatlar yuz berganligi oqibatida hujjatlarni tiklaganlik uchun undirilmagan toʻlovlar, mazkur holatlar yuzasidan aybdor shaxslar (tashkilotlar) mavjud boʻlsa, keyinchalik ulardan regress tartibida undiriladi.

Ofatlar yuz berganligi oqibatida jismoniy shaxslarning aybisiz hujjatlar yoʻqotilsa yoki yaroqsiz holga kelsa, ularga nisbatan jazo choralari qoʻllanilmaydi.