Nurobod tumanidagi Tim qishlogʻi, Arab ota mahallasi viloyat markazidan 130-140 kilometr uzoqlikda, choʻl zonada joylashgan. Mahallada 7 ta guzar boʻlib, shundan Yangihayot guzarida yashovchi aholi ichimlik suvidan qiynalib kelardi. Guzarda 190 xonadonda 790 nafar aholi istiqomat qiladi. Ularga ichimlik suvi tashib keltiriladi, yaʼni bir mashina suvni aholi 50-60 ming soʻmga sotib olardi. Sotib olgan suvni har bir xonadon oʻzi qazib tayyorlagan maxsus hovuzda saqlardi. Qisqasi, bir mashina suv har bir xonadonga 15-20 kunga, oshib borsa bir oyga yetardi.

2019-yilning 24-noyabrida viloyat hokimi Erkinjon Turdimov Tim qishlogʻiga tashrif buyurganida, ushbu muammo aholi tomonidan koʻtarildi. Shundan soʻng oʻtgan davr mobaynida mahalliy mablagʻlar hisobidan qiymati 420 million soʻmlik ishlar bajarilib, 3 kilometr ichimlik suvi tarmogʻi tortildi, 1 ta artezian qudugʻi, 1 ta TP 63 transformatori oʻrnatildi. Natijada, ichimlik suvi tarmogʻi hududdagi ijtimoiy soha obyektlarini hamda hududda istiqomat qiluvchi 1500 dan ortiq aholi xonadonlarini toza ichimlik suvi bilan taʼminlandi.

Abdulaziz Yoʻldoshev
(Xalq soʻzi)