Jahongir BOYMURODOV/“Xalq soʻzi”. “Nurafshon” yozgi bolalar dam olish oromgohi Kitob tumanining Qaynar qishlogʻi hududida, salqin, soʻlim va bahavo manzilda joylashgan. Ayni paytda oromgohda 3-mavsumda 200 nafarga yaqin bolajonlar maroqli hordiq chiqarmoqda. Ularning isteʼdodini yuzaga chiqarish, jamoaviylik va tashabbuskorlikni oshirishga qaratilgan sport musobaqalari, ijodiy tanlovlar, maʼnaviy-maʼrifiy muloqotlar, davra suhbatlari oʻtkazib borilmoqda.

Ana shunday tadbirlardan biri Respublika Maʼnaviyat va maʼrifat markazi Qashqadaryo viloyati boʻlimi rahbari, senator Komila Karomova hamda xalq deputatlari viloyat Kengashi raisi Ismigul Xushmurodova ishtirokida tashkil etildi.

— Tadbir doirasida oromgohda yaratilgan shart-sharoitlar bilan tanishdik, bolajonlar bilan dildan muloqot qildik, — deydi senator Komila Karomova. — Shu bilan bir qatorda, ularning qiziqishidan kelib chiqqan holda ijodiy, intellektual tanlovlar hamda sport musobaqalari ham tashkil etildi. Bugungi yoshlarimizning har jabhada faolligi, zukkoligi, bilimi bizni xursand qildi.

Oromgohda oʻtkazilgan tanlov va musobaqalarda faollik koʻrsatgan bolajonlarga tashkilotchilarning esdalik sovgʻalari topshirildi.