Bosh prokuratura huzuridagi Departamentning Nukus shahri boʻlimi, Bojxona va IIB xodimlari hamkorligida tezkor tadbir oʻtkazildi, deb xabar bermoqda Iqtisodiy jinoyatlarga qarshi kurashish departamenti.

Unda aytilishicha, oʻtkazilgan tezkor tadbir davomida fuqarolar J.B. va P.D. YATT “B.X.”ning Nukus shahridagi savdo doʻkonida qonunga xilof ravishda dori vositalari savdosi bilan shugʻullanib kelganliklari aniqlanib, fuqaro M.X.ga tarkibida inson ruhiyatiga kuchli taʼsir qiluvchi moddalari mavjud boʻlgan 6 quti “Molecule plus” dori vositasini 2,3 million soʻmga sotgan vaqtida ashyoviy dalillar bilan qoʻlga olingan.

Hozirda mazkur holat yuzasidan Jinoyat kodeksining 251-1-moddasi (giyohvandlik vositalari, ularning analoglari yoki psixotrop moddalar hisoblanmaydigan kuchli taʼsir qiluvchi moddalarni targʻib qiluvchi mahsulotni tayyorlash, tarqatish, reklama qilish, namoyish etish yoki bunday moddalarni yoxud zaharli moddalarni qonunga xilof ravishda muomalaga kiritish) bilan jinoyat ishi qoʻzgʻatilib, tergov harakatlari boshlab yuborilgan.