Xabar qilganimizdek, Pro-liga 20-turi doirasida Fargʻona shahridagi “Istiqlol” stadionida boʻlib oʻtgan “Neftchi”-“Turon” uchrashuvidan (0:1) keyin tartibsizlik roʻy berdi.

Holat boʻyicha Jinoyat Kodeksning tegishli moddalari asosida 6 nafar shaxsga jinoyat ishi qoʻzgʻatildi. Ommaviy tadbirlar oʻtkazilayotgan vaqtda ishtirok etgan 5 nafar shaxslarning harakatlarida Maʼmuriy javobgarlik toʻgʻrisidagi Kodeksining 183-moddasida (mayda bezorilik) nazarda tutilgan huquqbuzarlik aniqlanganligi bois, ular maʼmuriy tartibda ushlanib, tegishli hujjatlar rasmiylashtirildi.

Fargʻona shahar maʼmuriy sudi tomonidan O. Yusupov, S. Hikmatov, I. Tursunov, M. Akramov va Q. Mamajonovlarga nisbatan toʻplangan ish materiali koʻrib chiqildi.

Ular jamiyatda yurish-turish qoidalarini qasddan mensimasdan jamoat tartibini buzib, futbol oʻyinida baqir-chaqir koʻtargan. Tartibsizlik vaqtida ichki ishlar xodimlarining qonuniy talablariga boʻysunmasdan faol qarshilik koʻrsatgan. Sud tomonidan ularning xatti-harakatlariga huquqiy baho berildi.

Ish materiali va sudda huquqbuzar O.Yusupov, S.Hikmatov, I.Tursunov, M.Akramov va Q.Mamajonovlarni faqat jamiyatdan ajratgan holda qamoq jazosi tayinlash orqali ularni tarbiyalash mumkinligi aniqlandi.

Fargʻona shahar maʼmuriy sudi raisi Solijon Qurbonovning xabar berishicha, huquqbuzarlarga oʻn besh sutka maʼmuriy qamoq jazosi tayinlandi.