Foto: Xalq so‘zi

Yurtimizda izlanish va intilishlari bilan koʻpchilikni hayratga solayotgan iqtidorli yoshlar safi kun sayin kengayib bormoqda. Ulardan biri - Namangan shahridagi 1-davlat ixtisoslashtirilgan umumtaʼlim maktab-internati bitiruvchisi Hikmatilla Xudoyberdiyev erishgan natija, ayniqsa, havas qilgulik. Oʻz ustida tinim bilmay ishlaydigan yigit bir paytning oʻzida AQSH, Shveysariya va mamlakatimizning jami 18 ta oliygohlari talabaligiga muddatidan avval qabul qilinish huquqini qoʻlga kiritdi. Ayni imkoniyat hisobiga 1 million 317 ming 600 AQSH dollari miqdoridagi grant sohibi boʻldi.

Yosh hamyurtimiz qoʻlga kiritgan katta muvaffaqiyat zamirida uning tirishqoqligi, fanlarni chuqur darajada oʻzlashtirishdek mashaqqatli mehnat turibdi. U matematika va ingliz tili fanlari boʻyicha eng yuqori ball toʻplagan holda xalqaro SAT sertifikatiga ham ega boʻldi.

— Ilmga intilish insonni maqsadga yetkazadi,  — deydi Hikmatilla Xudoyberdiyev. — Maktabni tugallash arafasidayoq OTM talabaligi kafolatini qoʻlga kiritganimdan, eng avvalo, ustozlarim, ota-onam, tengdoshlarim xursand. 18 ta oliygohning bari xalqaro reytingda yuqori oʻrinlarda turadi. Ularning qay birida oʻqish masalasiga kelsak, oʻz qiziqishlarimdan kelib chiqib tanlayman.

Qudratilla NAJMIDDINOV, “Xalq soʻzi”.