Foto: Illustrativ surat

Namangan shahrida faoliyat yurituvchi “Qurilish N” (nomi oʻzgartirilgan) masʼuliyati cheklangan jamiyati soliq toʻlovi boʻyicha kutilmagan holatga tushib qoldi. Gap shundaki, mazkur subyekt faoliyatida Namangan viloyat davlat soliq boshqarmasi tomonidan soliq auditi tekshiruvi oʻtkazilib, natijasiga koʻra, 2 milliard soʻmdan ortiq qoʻshimcha soliq hisoblangan.

Oʻz huquqini yaxshi bilgan rahbar bunday paytda shoshib qolmaydi, balki masalaga qonuniy yondashgan holda aniqlik kiritishga harakat qiladi. MCHJ mutasaddisi soliq organining jamiyatga qoʻshimcha soliq hisoblash haqidagi qarorini bekor qilish yuzasidan tegishli idoraga murojaat qiladi. Amaldagi tartibga koʻra, uning arizasi Namangan tumanlararo maʼmuriy sudida koʻrib chiqilib, Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil devoni masʼul xodimlari jamiyat manfaatlarini himoya qilib ishtirok etishadi.

Natija qanday boʻldi, dersiz. Jarayonda soliq organi tomonidan jamiyat faoliyatini tekshirishdan avval tekshirishlarni nazorat qiluvchi vakolatli organ xabardor qilinmagani va qonun hujjatlari talablariga rioya qilinmagani oʻz tasdigʻini topdi va sud oʻz soʻzini aytdi: Namangan viloyat davlat soliq boshqarmasining “Qurilish N” masʼuliyati cheklangan jamiyatiga 2 milliard soʻmdan ortiq qoʻshimcha soliq hisoblash haqidagi qarori haqiqiy emas.

Shu tariqa yana bir tadbirkorning qonuniy manfaatlari munosib himoya qilindi.

Qudratilla NAJMIDDINOV, “Xalq soʻzi”.