Foto: “Xalq so‘zi”

Aholining ijtimoiy himoyaga muhtoj qatlami,  ayniqsa e’tiborga muhtoj yoshlarni qo‘llab-quvvatlash  borasida yurtimizda amalga oshirilayotgan xayrli ishlar fuqarolarning  davlat   g‘amxo‘rligini his etib, hayotdan rozi bo‘lib yashashlariga imkoniyat yaratmoqda. Kecha  Namangan viloyat hokimi Shavkat  Abdurazzoqov   Yangiqo‘rg‘on tumanida imkoniyati cheklangan 7 nafar  yosh  bilan uchrashib, ularga so‘nggi rusumdagi elektron yuritmali nogironlar aravachalarini topshirgan chog‘da to‘planganlar bunga yana bir bor amin bo‘ldilar.

- 19 yoshli o‘g‘lim Abdumajid oyog‘ida rivojlangan kasallik sabab 7 yildan beri deyarli harakatdan qolgandi.  Unga berilgan oddiy aravachani boshqarishda esa  qiynalardi. Mana, bugun  yaxshi insonlar ko‘magi bilan  uyimizga  o‘zi yurar aravachani olib kelishdi. Unga o‘tirib hovlini aylangan paytda farzandimning ko‘zi quvonchdan chaqnab ketganini ko‘rsangiz edi . Endi bolajonim  ko‘cha-kuyga bemalol chiqib, ko‘pchilik bilan ko‘rishadi, kayfiyati ko‘tarilib, dardlari unutiladi, -  deydi Zarkent mahallasida yashovchi Abdulaziz Hakimjonov.

Ma’lumot o‘rnida:  shu kunlarda   viloyat bo‘yicha hammasi bo‘lib  100 ta elektron yuritmali nogironlar aravachasi tarqatilmoqda. Davlat aktivlarini boshqarish agentligi  mablag‘lari  hisobiga harid qilingan ushbu vositalar "Mahalla" xayriya jamoat fondi hamkorligida o‘z egalariga topshirilmoqda.

 Qudratilla NAJMIDDINOV  

“Xalq so‘zi”.