Namanganliklarning oʻziga xos anʼanasi — “Gullar bayrami”ning navbatdagi 60-yubiley sanasi tomoshalari nihoyasiga yetdi. Viloyat markazidagi Zahiriddin Muhammad Bobur nomli madaniyat va istirohat bogʻida bir haftadan ortiq davom etgan festivaldagi betakror gul koʻrgazmalari, rang-barang madaniy va maʼrifiy dasturlar viloyat ahli hamda mehmonlarga olam-olam zavq berdi. Eʼtiborli jihati, joriy yildagi nafosat ayyomi davomida bogʻdagi tomoshalarga kuniga 100 mingga yaqin odam tashrif buyurdi. Ular orasida uzoq va yaqin xorijdan kelgan sayyohlar, mamlakatimiz viloyatlaridan kelgan gul ishqibozlari bor. 31 davlatning axborot agentliklari, kundalik matbuot va internet nashrlari, televideniyesi gullar festivalini olamga doston qildi.

Kecha oqshom viloyat markazidagi “Afsonalar vodiysi” tematik bogʻida bayram doirasida oʻtkazilgan eng yaxshi gulchilar tanlovi gʻoliblari, shuningdek, tadbirni tayyorlash va oʻtkazishning faol tashkilotchilarini taqdirlashga bagʻishlangan tantanali marosim oʻtkazildi. Unda poytaxtdan tashrif buyurgan taniqli estrada xonandalari hamda viloyat sanʼat ustalarining gala konserti sadolari ostida mukofot va sovrinlar oʻz egalariga topshirildi. Xususan, oʻzining ajoyib koʻrgazmasi bilan ishtirokchilarda katta taassurot qoldirgan Pop tumani, viloyat qurilish bosh boshqarmasi, Milliy gvardiya viloyat boshqarmasi hamda dizayner gulchi Obidxon Qodirov oliy oʻringa munosib topilib, “Nexia-3" avtomashinasi bilan taqdirlandilar.Tanlovda faxrli oʻrinni egallagan gulchilar va bir qator nominatsiyalar gʻoliblari,shuningdek, faol tashkilotchilarga qimmatbaho sovgʻalar taqdim etildi.

Tantanali marosimda viloyat hokimi Sh. Abdurazzoqov ishtirok etdi.

Qudratilla NAJMIDDINOV,
“Xalq soʻzi”.