Mamlakatimizga sifati kafolatlanmagan hamda xavflilik darajasi yuqori boʻlgan pirotexnika vositalarini noqonuniy olib kirilishi va saqlanishiga bojxona organlari tomonidan boshqa huquqni muhofaza qiluvchi organlar bilan hamkorlikda tizimli ravishda qarshi kurash olib borilmoqda.

Jumladan, Fargʻona viloyati bojxona boshqarmasi Kontrabandaga qarshi kurashish boʻlimi xodimlari tomonidan oʻtkazilgan tezkor tadbir davomida, “Vodil-Oltiariq” yoʻnalishida harakatlanib kelgan fuqaro Z.M. boshqaruvidagi “Orlando” rusumli avtotransport vositasi Oltiariq tumani hududida toʻxtab turgan vaqtida belgilangan tartibda xolislar ishtirokida koʻzdan kechirildi.

Natijada, avtomashina saloni va yukxonasida xorijda ishlab chiqarilgan hamda bojxona rasmiylashtiruvidan oʻtganligini tasdiqlovchi hujjatlari boʻlmagan umumiy qiymati 30 million soʻmlik 3 turdagi jami 384 dona pirotexnika vositalari borligi aniqlandi.

Yana bir shunga oʻxshash holatda, boshqarmaning Kontrabandaga qarshi kurashish boʻlimi xodimlari DXX CHQ xodimlari bilan hamkorlikda oʻtkazilgan pirotexnika vositalarining noqonuniy saqlanishiga chek qoʻyishga qaratilgan maqsadli “YAMA” tezkor tadbiri davomida, Dangʻara tumanida yashovchi fuqaro A.I.ning yashash xonadoni belgilangan tartibda xolislar ishtirokida koʻzdan kechirildi. Natijada, xonadonda xorijda ishlab chiqarilgan va bojxona rasmiylashtiruvidan oʻtganligini tasdiqlovchi hujjatlari boʻlmagan umumiy qiymati 20 million soʻmlik jami 105 600 dona «Treniya» nomli pirotexnika vositalari borligi aniqlandi.

Mazkur holatlar yuzasidan bojxona organlari tomonidan tergovga qadar tekshiruv harakatlari olib borilmoqda.