Foto: Xalq so'zi

Bugunga kunda aholi muammolariga yechim topish, ularning og‘irini yengil qilish, hayotdan rozi bo‘lib yashashida mahalla fuqarolar yig‘inlarining ishtiroki  ortib bormoqda. Ayni paytda Namangan viloyatida 791 ta o‘zini  o‘zi boshqarish organlari tashkil qilingan bo‘lib, ularning faoliyat ko‘rsatishlari uchun zarur shart-sharoitlar yaratib berilayotir.  Buni viloyat, shahar va tuman hokimliklarining sa’y-harakati bilan 650 ta mahalla fuqarolar yig‘ini  o‘z binosi,  mebellar, kompyuter  va boshqa zarur jixozlar bilan ta’minlangan xonalariga ega bo‘lganida ko‘rish mumkin.

Shu o‘rinda o‘z xizmat binosiga ega bo‘lmagan  yig‘inlarning  faoliyat yuritishlari uchun  vaqtinchalik bino bilan ta’minlab berilgani, ularning  59 tasiga yangi  bino qurilishi  olib borilayotganini ta’kidlab o‘tish joiz. Umuman olganda, joriy yil yakuniga qadar yana 76 ta MFY idorasi uchun zamonaviy binolar barpo etish  rejalashtirilgan.

Xalqimiz shodu-hurramlik bilan nishonlagan Navro‘z bayrami arafasida  shahar va tumanlardagi  7 ta mahalla fuqarolar yig‘iniga  qurilishi yakunlangan xizmat binolari tantanali ravishda topshirildi. Bu bilan joriy yilning o‘tgan davrida bitkazilgan idora binolari soni 13 taga yetdi.

Ulardan biri Uchqo‘rg‘on tuman “Dehqonobod” mahalla fuqarolar yig‘ini binosi  “Obod qishloq dasturi”  asosida tiklandi.  600 million so‘m mablag‘ evaziga qurib bitkazilgan inshootda yig‘in raisi, mahalladagi hokim yordamchisi, yoshlar yetakchisi, xotin-qizlar faoli hamda profilaktika inspektori uchun alohida-alohida xonalar mavjud bo‘lib, har biri  zamonaviy moddiy-texnika vositalari va mebel jihozlari bilan ta’minlangan. To‘raqo‘rg‘on tumanidagi moslashtirilgan joyda ish olib borayotgan  Dukat MFY ham o‘z binosiga ega bo‘ldi.  Hududda istiqomat qiluvchi tadbirkor Fayzullo  Yo‘ldoshevning davlat xususiy sherikchilik asosida qurib bergan binosi foydalanishga topshirilgan kuni “Mahalla” fondi bu yerga  15 million so‘mlik mebel va boshqa idora jihozlarini sovg‘a qildi.

-Vazirlar Mahkamasining "Fuqarolarning o‘zini o‘zi boshqarish organlari majmualarini tashkil etish bo‘yicha 2021-2022 yillarga mo‘ljallangan manzilli dasturni tasdiqlash to‘g‘risida”gi  qaroriga asosan tayyorlangan xududiy dasturga  290 ta mahalla binosi qurilishi kiritilib, shundan 236 tasi davlat-xususiy sheriklik asosida, 54 tasi mahalliy byudjetning qo‘shimcha manbalari hisobidan barpo etiladi, -deydi viloyat Mahalla va nuroniylarni qo‘llab-quvvatlash boshqarmasi boshlig‘i Ahmadjon A’loxo‘jayev. - Bugungi kunga qadar qaror talablaridan kelib chiqib 75 ta davlat-xususiy sheriklik asosida, 34 ta  mahalliy byudjetning qo‘shimcha manbalari hisobidan yangi  binolar qurildi. Ularni  jihozlash ishlariga   “Mahalla” xayriya jamoat fondi yaqindan yordam bermoqda. Bundan tashqari  har bir mahallaning o‘z sport maydonchasi va kutubxonasiga ega bo‘lishi yo‘lida ham amaliy ishlar olib borilayotir.  Hususan, viloyatdagi 724 ta o‘z o‘zini boshqarish organlarida kutubxona tashkil qilish  uchun 28960 ta kitoblar yetkazib berildi.

Qudratilla NAJMIDDINOV
“Xalq so‘zi”.