Foto: "Xalq so'zi"

Fargʻona viloyati Bagʻdod tumani “Dasht” mahalla fuqarolar yigʻini aholisi keyingi yillarda tomorqada issiqxona tashkil etib, limon yetishtirish borasida oʻziga xos tajriba maktabini yaratmoqda.  Ayni paytda mahallada mingdan ortiq xonadonning qariyb 600 tasida issiqxona mavjud boʻlib, ularda limon parvarishlanyapti. Tomorqa yerlarida dehqonchilik qilish noqulay, sugʻorish tizimida muammolar boʻlishiga qaramay, mahalla ahli limondan katta hosil olishga erishmoqda.

– Ichki ishlar sohasida ishlab, nafaqaga chiqqanimdan soʻng tomorqamizda issiqxona tashkil etdim,– deydi shu mahallada yashovchi Hasanboy Ergashev. – Bir sotix maydonda toʻla hosilga kirgan limondan yiliga 1,5 tonnagacha hosil olish mumkin. Shu yilning oʻzida 3 sotix maydondagi limondan  deyarli 70 million soʻm daromad oldim.   

Kuni kecha mahallaga tashrif buyurgan Fargʻona viloyati hokimi Xayrullo Bozorov aholini qiynab kelayotgan sugʻorish tizimini yaxshilash uchun 4 ta yangi suv qudugʻi qazib berilishini taʼkidlab, burgʻulash xarajatlari uchun davlat tomonidan subsidiya mablagʻlari ajratilishini maʼlum qildi.

Botir Madiyorov, “Xalq soʻzi”.