Foto: Халқ сўзи

14-yanvar — Vatan himoyachilari kuni Andijon viloyatida koʻtarinki ruhda nishonlandi. Asosiy tadbir ishtirokchilari viloyat markazidagi Xotira xiyobonida jam boʻldilar.

Qayd etilganidek, oʻtgan oʻttiz yilda Qurolli Kuchlarimiz qudrati jadal yuksaldi, salohiyatli, zamonaviy Milliy Armiyamiz shakllandi. Soʻzga chiqqanlar bugungi tinch hayot qadri, ona yurt madhi haqida ham toʻxtaldilar. Harbiy xizmatchilar tomonidan mudofaa qurollari va texnikalari, koʻrgazmali chiqishlar namoyish etildi.

— Bu zamonaviy harbiy texnik vositalar Qurolli Kuchlarimiz qudratidan dalolat, — deydi andijonlik mehnat faxriysi Otanazar ota Saydaliyev. — Ilohim, ular faqat tinchlik yoʻlida xizmat qilsin! Bugungi yoshlarimiz koʻzida chaqnab turgan otash aslo soʻnmasin. Vatanimizda hamisha osoyishtalik hukm sursin.

Faxriy xizmatchilar askarlar koʻchma oshxonasida mehmon boʻlib, unutilmas onlarni yodga oldilar. Yosh avlod uchun katta tarbiya maktabi vazifasini oʻtovchi bunday tadbirlar viloyatning barcha hududlarida davom etdi.

Saminjon HUSANOV, “Xalq soʻzi”.