Korrupsiyaga qarshi kurashish agentligida Rossiya Federatsiyasining Oʻzbekistondagi favqulodda va muxtor elchisi Oleg Malginov bilan uchrashuv boʻlib oʻtdi.

Korrupsiyaga qarshi kurashishda ikki tomonlama hamkorlikni rivojlantirish uchrashuvning asosiy mavzusiga aylandi. Xususan, ikki davlatda korrupsiyaga qarshi kurashish sohasida amalga oshirilayotgan islohotlar, korrupsiyaga qarshi siyosatlarining ustuvor yoʻnalishlari va vazifalar yuzasidan fikr almashildi.

Shuningdek, korrupsiyaga nisbatan murosasiz munosabatni shakllantirishda fuqarolik jamiyati institutlari, OAV ishtirokini yanada kuchaytirish, huquqni muhofaza qiluvchi va sud organlari oldida turgan vazifalar, yangi institutlar va tartiblarni joriy etish zarurligiga eʼtibor qaratildi.

Uchrashuv yakuni boʻyicha tomonlar oʻrtasida hamkorlikni yoʻlga qoʻyish, tegishli idoralar tajribasini oʻrganish hamda ikki davlat vakolatli idoralari oʻrtasida memorandum imzolash masalasini koʻrib chiqish kelishib olindi.