Jahon sogʻliqni saqlash tashkilotining maʼlum qilishicha, oʻtgan haftada Yer yuzi boʻyicha qariyb 2,9 million kishiga COVID-19 tashxisi qoʻyildi. Ulardan 11,1 mingdan ortigʻi xastalik oqibatida hayotdan koʻz yumdi.

Ushbu tahlillar 2-8-yanvar kunlari kasallanish koʻrsatkichlari undan avvalgi haftaga nisbatan 9 foiz, oʻlim holatlari esa 12 foizga kamayganini tasdiqlaydi.

Viruslar tarqalishining sezilarli pasayishi Yevropa (-36 foiz), Janubi-Sharqiy Osiyo (-27 foiz) va Afrika (-23 foiz) mintaqasi mamlakatlarida qayd etildi.

Oʻlim koʻrsatkichlari esa asosan Afrika (-53 foiz), Yevropa (-34 foiz) va Janubi-Sharqiy Osiyoda (-19 foiz) kamaydi.

Sharqiy Oʻrta yer dengizi mintaqasi davlatlarida esa aksincha — koronavirus qurbonlari soni 31 foizga oshdi.

Oʻtgan haftada eng koʻp kasallanishlar Yaponiya, AQSH, Janubiy Koreya, Xitoy va Braziliyada roʻyxatga olingan.

Eng koʻp bemorlar oʻlimi AQSH, Yaponiya, Braziliya,  Xitoy, Fransiya  davlatlarda aniqlangan.

Kamayish koʻrsatkichlariga qaramay, JSST dunyo boʻylab “omikron”ning yangi — XBB.1.5 subvarianti tez surʼatlarda tarqalayotgani bois aholiga COVID-19ga qarshi toʻliq bosqichlarda va buster dozada emlanishni tavsiya qilmoqda.