Buxoro viloyat sudida 2022-yil 1-2-iyul kunlari Nukus shahrida sodir etilgan ommaviy tartibsizliklar boʻyicha 22 nafar sudlanuvchiga oid jinoyat ishini koʻrib chiqish boʻyicha ochiq sud jarayonlari davom etmoqda.

Milliy gvardiya hamda Bosh prokuratura masʼullarining iyul oyidagi ommaga elon qilgan maʼlumotlarida namoyishlardagi ishtiroki uchun 516 kishi qoʻlga olingani maʼlum qilingan edi. Jamoatchilikda qolgan shaxslar qayerda degan mazmundagi savollar yuzaga keldi.

Yuqoridagilardan kelib chiqib, Mustaqil komissiya shuni maʼlum qiladiki, sud jarayonlarida 22 nafar sudlanuvchiga oid jinoyat ishi koʻrib chiqilayotgan boʻlsa, qoʻlga olinganlarning 107 nafari Komissiya tashabbusi bilan jamoat kafilligi va qamoq ehtiyot chorasi insonparvarlik tamoyili asosida uy qamogʻi tarzidagi ehtiyot chorasiga almashtirilishi orqali oʻz oilasi bagʻriga qaytarilgan. Qolgan shaxslar esa maʼmuriy javobgarlikka tortilgan.

Sud majlisida kuzatuvchi sifatida ishtirok etgan Qoraqalpogʻiston Respublikasida yuz bergan holat va voqealarni oʻrganish hamda ular yuzasidan mustaqil tekshiruv oʻtkazish boʻyicha komissiya aʼzolarining maʼlum qilishicha, sud jarayonlari qonunchilikka muvofiq oʻtkazilmoqda.

29-noyabr kungi sud jarayonlarida namoyishlarga boshchilik qilgan Dauletmurat Tajimuratovga nisbatan guvohlarning fikrlari oʻrganilmoqda. Komissiya jarayonlarni kuzatib bormoqda.