Illyustrativ foto

Koʻkdala tumanidagi yuz bergan yongʻinda jabr koʻrganlarning oilalariga yordam pullari ajratildi. Bu haqda tuman hokimligi matbuot xizmati xabar qildi.

Qayd etilishicha, yongʻinda halok boʻlgan fuqarolarning oilalariga 100 million soʻmdan, yongʻinda jarohatlangan va ayni damda davolanishda boʻlgan fuqarolarga esa 50 million soʻmdan naqd pul koʻrinishda kompensatsiya toʻlab berildi.

“Ushbu mablagʻlar tuman hokimi hamda hokimlik masʼullari ishtirokida fuqarolarning xonadonlari hamda davolanish joylariga olib borib berildi”, deyiladi xabarda.

Bundan tashqari jarohatlangan fuqarolar toʻliq tuzalib ketgunga qadar malakali shifokorlar ularga bepul tibbiy xizmat koʻrsatishi maʼlum qilingan.

Eslatib oʻtamiz, joriy yilning 16-iyul kuni Qashqadaryo viloyati Koʻkdala tumanida joylashgan avtomobillarga gaz quyish shoxobchasida yirik yongʻin sodir boʻldi. Hodisa oqibatida 4 nafar fuqaroning halok boʻlgan.

Avvalroq Samarqand viloyati Kattaqoʻrgʻon tumanidagi avtomobillarga yonilgʻi quyish shoxobchasida sodir boʻlgan portlashda 3 kishi halok boʻlgani haqida xabar qilgandik.