Davlatimiz rahbari 2020-yilning 12-13-mart kunlari Xorazmga tashrifi chogʻida Shovot tumanidagi 1-son ixtisoslashtirilgan davlat umumtaʼlim maktab-internati negizida Al-Xorazmiy nomidagi xalqaro fizika va matematika maktabini tashkil etish tashabbusini qoʻllab-quvvatladi. 2020-yilning 19-martida esa Respublika Vazirlar Mahkamasining “Al-Xorazmiy nomidagi Xalqaro fizika-matematika maktab-internatini tashkil etish toʻgʻrisida”gi qarori qabul qilindi. Qarorda maktabni zamonaviy taʼlim dargohiga aylantirish, unda tahsil oladigan oʻquvchilarni mustaqil fikrli, tashabbuskor, kreativ va xalqaro maydonda oʻzini dadil namoyon eta oladigan ilmli yoshlar sifatida tarbiyalash maqsadi qoʻyilgan.

Shu oʻrinda ushbu taʼlim dargohining tarixi va eʼtirofga loyiq natijalari haqida toʻxtalib oʻtish joiz. Tashkil etilganiga 45 yil boʻlgan ushbu maktab-internatidan oʻtgan yillar mobaynida 105 nafar fan doktori va fan nomzodi, matematika va fizika fanlari boʻyicha 81 nafar respublika, 34 nafar xalqaro olimpiadalar gʻoliblari yetishib chiqqan.Hozirgacha maktab-internatini tamomlagan 3719 nafar bitiruvchilarning 3014 nafari oliy taʼlim dargohlarida tahsil olib, bugungi kunda davlat boshqaruvi, ilm-fan, huquqni muhofaza qilish tizimida samarali faoliyat olib bormoqdalar.

Bugun xalqaro maktab-internatining ochilishi munosabati bilan oʻtkazilgan tantanali tadbirda mehnat faxriylari, ustoz murabbiylar, ushbu maktabning sobiq bitiruvchilari, keng jamoatchilik vakillari ishtirok etdi. Xorazm viloyati hokimi F.Ermanov, Oʻzbekiston Respublikasi xalq taʼlimi vaziri Sh.Shermatov, Oʻzbekiston Respublikasi adliya vaziri, ushbu maktabning sobiq bitiruvchisi R.Davletov yangi ilm maskani ochilishi bilan barchani samimiy muborakbod etdilar.

Maydoni 32 ming kvadrat metr boʻlgan zamonaviy kampusdan 7 ta blokdan iborat binolar, xususan, oʻquv binosi, maʼmuriyat, oshxona, mehmonxona, sport zallari hamda dam olish maskanlari joy olgan. Oʻquv maskanida oldida buyuk mutafakkir, algoritm asoschisi Al-Xorazmiyning muazzam haykali qad rostladi.

Yangi muassasada davlat taʼlim standartlari asosida zamonaviy axborot texnologiyalaridan keng foydalangan holda aniq va tabiiy fanlar, shuningdek, chet tillarining chuqur oʻqitilishini taʼminlanadi.Buning uchun maktabga mahalliy va xorijlik yuqori malakali oʻqituvchilar jalb qilinadi.

Odilbek Odamboyev,

“Xalq soʻzi”