2022-yilning 21-noyabr kuni Oʻzbekiston Respublikasi Oliy Majlisining Inson huquqlari boʻyicha vakilining (ombudsmanning) Xorazm viloyatidagi mintaqaviy vakili Odilbek Ollayorov tomonidan Xiva nogironligi boʻlgan shaxslar uchun erkaklar “Muruvvat” internat uyiga monitoring tashrifini amalga oshirildi.

Xiva “Muruvvat” internat uyi 330ta oʻringa moʻljallangan boʻlib, monitoring oʻtkazilgan kunda 329 ta bemor davolanayotganligi maʼlum boʻldi.

Monitoringda bemorlarni yashash, ovqatlanish, tibbiy xizmatdan foydalanish sharoitlari oʻrganildi. Aniqlanishicha, bemorlarga autsorsing xizmati asosida kuniga 4 mahal issiq ovqat beriladi. Bemorlarga qarindoshlari bilan uchrashish uchun ham yetarli sharoitlar yaratilgan.

Tibbiyot xodimlari tomonidan dori-darmonlar yetarli ekanligi maʼlum qilindi. Ularni tanlab koʻzdan kechirilganda yaroqlilik muddati oʻtganlari aniqlanmadi.

Shuningdek, muassasada yashayotgan nogironligi boʻlgan shaxslarning yuvinish xonalari koʻzdan kechirilganda, sanitar-gigiyena talablariga oid kamchiliklar aniqlanmadi.

Monitoring davomida qator kamchiliklar ham aniqlandi. Jumladan, muassasaning oshxonasi va ovqatlanish zali koʻzdan kechirilganda oshxona binosi taʼmirtalabligi va belgilangan talablarga javob bermasligi aniqlandi.

Muassasadagi bemorlar bilan xoli tarzda suhbatlashilganda sharoitlar boʻyicha ariza va shikoyatlar kelib tushmadi.Monitoring davomida aniqlangan kamchiliklarni bartaraf etish boʻyicha mintaqaviy vakil tomonidan muassasa rahbariyatiga tavsiyalar berildi.