Foto: Reuters

Xitoy boʻylab 80 000 dan ortiq savdo nuqtalariga ega “M&G Stationery” kanselyariya kompaniyasi 29-noyabrdan boshlab A4 formatidagi oq qogʻozlarni onlayn va oflayn rejimda sotishni taqiqlashga qaror qildi. Bu qarorga ayrim namoyishchilar qogʻoz parchalariga hukumatga qarshi shiorlar yozgani sabab boʻldi.

Kompaniya qogʻoz sotmasligi haqida Xitoy ijtimoiy tarmoqlarida tarqalgan ichki xatlardan birida aytilgan. Unda taʼkidlanishicha, taqiq “milliy xavfsizlik va barqarorlikni saqlash” hamda “jinoyatchilarning katta miqdorda A4 formatidagi oq qogʻozni toʻplashi va undan noqonuniy buzgʻunchilik uchun foydalanishining oldini olish” uchun kiritilgan. Shu oʻrinda “M&G Stationery” vakillari ham mitinglarni qoralashini ham qoʻshimcha qilgan.

“M&G Stationery” kompaniyasi Shanxayda joylashgan boʻlib, oʻz mahsulotlarini dunyoning 50 dan ortiq mamlakatlari va mintaqalariga sotadi. 

Namoyishlarga Shinjonning Urumchi shahrida 10 kishi halok boʻlgan yongʻin sabab boʻlgan. Maʼlum qilinishicha, “COVID-19” tufayli kiritilgan cheklovlar tufayli odamlarni qutqarib qolishning imkoni boʻlmagan. Namoyishchilar koronavirus cheklovlarini yumshatishni talab qilmoqdalar va baʼzilari hatto Xitoy raisi Si Szinpinning isteʼfosini ham talab qilmoqdalar. Manbada aytilishicha, rasmiylar mitinglarni kuch ishlatish yoʻli bilan tarqatmoqda.