Xalq ustasi taklifiga koʻra Fransiyaning Burj va Buxoroning Gʻijduvoni birodarlashgan shahar maqomini olishi mumkin

17:11 22 Noyabr 2022 Jamiyat
510 0

Foto: Xalq so‘zi

Yaqinda Fransiyaning “A.S.I.E.” xalqaro assotsiatsiyasi tomonidan tashkil etilgan festivalda bir necha davlat qatorida mamlakatimiz vakillari ham ishtirok etdi.

— Delegatsiyamiz aʼzolari Burj shahri va shahar atrofi hududlarida taqdimot, koʻrgazma va konsertlar oʻtkazdi, — deydi festival ishtirokchisi, Oʻzbekiston xalq ustasi Abdulla Narzullayev. — Bularning bari fransuzlarda katta qiziqish uygʻotdi. Oʻzimga kelsam, “A.S.I.E.” xalqaro assotsiatsiyasi bilan uch yildan buyon samarali hamkorlik qilib kelaman. Shu hamkorlik doirasida Fransiya Oliy hunarmandchilik maktabi talabalarining bir necha nafari Oʻzbekistonda, jumladan, Gʻijduvonda boʻlishdi. Ularga kulolchilikdan mahorat saboqlari oʻtdik.

Eʼtiborlisi, Oʻzbekiston xalq ustasi Burj shahri meriyasi bilan uchrashuv chogʻida bu koʻrkam kentni Gʻijduvon bilan birodarlashgan shahar qilish taklifini oʻrtaga tashladi. Taklif mezbonlar tomonidan oʻrganib chiqiladigan boʻldi. Shu maqsadda Burj shahri vakillari kelgusi yilning aprel- may oylarida yurtimizga, xususan, Gʻijduvonga tashrif buyurish niyatidalar.

— Ayni damda Gʻijduvon tuman hokimligi va Buxoro viloyat turizmni rivojlantirish departamenti bilan hamkorlikda mazkur tashrifga tayyorgarlik ishlarini boshlab yubordik,- deydi A. Narzullayev. — Tadbirkorlik, hunarmandchilik, pazandachilik maktabi bilan dong taratgan Gʻijduvon Fransiyaliklar tasavvuridagi shahar ekaniga ishonchim komil.

Maʼlumot tariqasida aytish lozimki, Burj Portugaliyaning Aveyru, Germaniyaning Augsburg, Polshaning Koshalin, Ispaniyaning Palensiya shaharlari bilan birodarlashgan. Ular safiga Gʻijduvon ham qoʻshilsa, ajab emas.

Istam IBROHIMOV, “Xalq soʻzi”.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?