Buxoro shahrida boʻlib oʻtayotgan “Ipak va ziravorlar” festivali har bir hunarmand uchun unutilmas bayramdir.

Yogʻoch oʻymakorligi bilan shugʻullanib, elda obroʻ-eʼtibor topgan Akmal Muhitdinov shu bayramga ajoyib tuhfa hozirladi. U Buxoro tumani markazi Galaosiyo shahrida muhtasham hunarmandchilik markazini barpo etdi. “Naqshband” deya nomlangan ushbu maskan bir gektar maydonni egallagan boʻlib,oʻziga xos meʼmoriy yechimga ega. Uning birinchi binosida tasviriy sanʼat muzeyi, sayyohlar uchun moʻljallangan mehmonxona va restoran joylashgan. Buxoroning qadimiy ipak qogʻozi, kashtachilik buyumlari hamda somondan tasviriy sanʼat asarlari tayyorlanadigan binoda esa zarur barcha qulayliklar yaratilgan. Yana bir binoda yogʻoch oʻymakorligi ustaxonasi joylashgan.

Markazda oʻttiz nafardan ziyod hunarmandning faoliyat yuritishi uchun qulayliklar muhayyo etilgan. Bundan tashqari, qirq nafardan ziyod oʻgʻil-qiz “Usta-shogird” usulida hunarmandchilik sirlarini oʻrganyapti.

Usta bu yerda yaqin istiqbolda tosh oʻymakorligi, xattotlik va miniatyura sanʼati yoʻnalishida ham oʻquv mashgʻulotlarini yoʻlga qoʻyish niyatida. Xorijiy va mahalliy sayyohlar uchun mahorat saboqlari ham oʻtiladi.

Bu koʻrkam maskan davlatimizning milliy hunarmandchilikni ravnaq toptirish, ildizi necha ming yillarga borib taqaladigan madaniy merosimizni asrab-avaylash yoʻlida amalga oshirayotgan ishlarining kichik bir mahsuli, albatta. Markazning ochilish marosimida soʻz olgan viloyat hokimi B. Zaripov ana shuni alohida taʼkidladi.

Istam IBROHIMOV,
(“Xalq soʻzi”)