“Kamondan otish sport turini yanada rivojlantirish va ommalashtirish chora-tadbirlari toʻgʻrisida”gi Prezident qarori (PQ–5149-son, 17.06.2021-y.) qabul qilindi.

Qarorga koʻra:

har bir bolalar-oʻsmirlar sport maktabida (kelgusida yangi tashkil qilinadigan maktablarda ham) kamondan otish seksiya va boʻlimlari tashkil etiladi;

har bir olimpiya zaxiralari kollejida (kelgusida yangi tashkil qilinadigan kollejlarda ham) kamondan otish boʻlimlari ochiladi;

2022/2023 oʻquv yilidan Oʻzbekiston davlat jismoniy tarbiya va sport universitetida kamondan otish taʼlim yoʻnalishi ochiladi.

2021-yil 1-sentyabrdan:

kamondan otish sport turi boʻyicha hududlarda iqtidorli yoshlarni aniqlash, tanlash va saralash (seleksiya)ning uch bosqichli tizimi joriy etiladi;

har yili anʼanaviy tarzda kamondan otish sport turi boʻyicha:

● Toshkent shahrida “Alpomish va Barchinoy” xalqaro turniri tashkil etiladi;

● Samarqand shahrida ayollar oʻrtasida “Toʻmaris kubogi” xalqaro turniri oʻtkaziladi;

● Buxoro, Qoʻqon, Samarqand va Xiva shaharlarida “Turizm va kamondan otish haftaligi” tashkil etiladi.

Qarorga koʻra shuningdek, 2022–2024-yillarda Qoraqalpogʻiston Respublikasi, viloyatlar va Toshkent shahrida kamondan otish sport turi boʻyicha jahon standartlariga javob beradigan sport bazalari (14 ta) tashkil etiladi.