Foto: Халқ сўзи

Kuni kecha Kattaqoʻrgʻon shahridagi “Qoʻshhovuz” mahalla fuqarolar yigʻini binosi yangidan qurilib, foydalanishga topshirildi.

Binoning taqdimot tadbirida Kattaqoʻrgʻon shahar hokimi, senator Gavhar Alimova, Oliy Majlis Senati aʼzosi Farmon Toshev, keng jamoatchilik vakillari ishtirok etib, bu yerda yaratilgan shart-sharoitlar bilan tanishdi.

— 1956-yilda qurilgan eski binoda ish yuritar edik, — deydi “Qoʻshhovuz” MFY raisi S. Negmatova. — Toʻgʻrisi, yozda jazirama, qishda izgʻirin boʻladigan binoda ishlash uchun hech bir imkoniyat yoʻq edi. Juda qiynalardik. Mana, zamonaviy koʻrinish va qulaylikka ega yangi binoning qurib berilgani nafaqat bizni, balki mahallamizning kattayu kichigini birdek quvontirdi.

Samarqand viloyat mahalla va nuroniylarni qoʻllab-quvvatlash boshqarmasi tomonidan yil yakuniga qadar 200 ga yaqin mahalla fuqarolar yigʻinlarining binosi yangidan qurib bitkazilishi rejalashtirilgan. Bugunga qadar esa 42 ta MFY yangi binoli boʻldi.

Abdulaziz Yoʻldoshev, “Xalq soʻzi”.