Ijodkorlar sportdagi salohiyatini namoyish etdilar

13:10 23 Iyun 2022 Jamiyat
202 0

Foto: Xalq so‘zi

Oʻzbekiston Jurnalistlari ijodiy uyushmasining Andijon viloyati boʻlimi tomonidan 27-iyun – Matbuot va ommaviy axborot vositalari xodimlari kuni oldidan yirik sport bayrami tashkil etildi. Unda jurnalistlar, matbaa xodimlari, bloger va matbuot xizmatlari rahbarlari sportning oʻnlab turlari boʻyicha oʻzaro kuch sinashdilar.

— Ijodkorlarning xizmatdan boʻsh vaqtlarini mazmunli tashkil etish maqsadida turli tadbirlar ishlab chiqqanmiz, — deydi uyushmaning viloyat boʻlimi rahbari Mahfuraxon Ortiqova. — Jumladan, har oyda bir marta sport musobaqalari boʻlib oʻtadi. Bu galgi bellashuv esa bayramona kayfiyat kasb etdi. Bu yorqin taassurotlar ijodiy faoliyatimizga ijobiy taʼsir koʻrsatishi, shubhasiz.

Andijon shahridagi “Barkamol avlod” sport majmuasida boʻlib oʻtgan bellashuvlarda viloyat teleradiokompaniyasi, “Taraqqiyot” telekompaniyasi, “Andijonnoma” gazetasi va “Matbuot tarqatuvchi” MCHJ jamoalari faol ishtirok etgan boʻlsa, Munojotxon Kamolova, Faxriddin Ibaydullayev, Muxlisaxon Sobirova, Komilaxon Abdiyeva kabi ijodkorlar sportdagi salohiyatini namoyish qilishdi.

— Biz odatda madaniy va maʼrifiy tadbirlarni, ayniqsa, sport bellashuvlarining hayotimizdagi muhim jihatlarini koʻp yoritamiz-u, biroq oʻzimiz kam ishtirok etamiz, — deydi “Andijon hududiy elektr tarmoqlari korxonasi” AJ matbuot xizmati rahbari Muxlisaxon Sobirova. — Bu galgi tadbir bizni jismoniy jihatdan chiniqtiribgina qolmasdan, oʻzaro hamjihatlikning ijobiy samarasini ham ifoda etib berdi.

Gʻoliblar va faol ishtirokchilar tashkilotchilar tomonidan esdalik sovgʻalari bilan taqdirlandilar.

 

Saminjon HUSANOV,  “Xalq soʻzi”.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?