Oʻzbekiston Iqtisodiyot va moliya vazirligi fuqarolarni “Tashabbusli byudjet“ doirasida ovoz berish bilan bogʻliq firibgarlik holatlaridan ogohlantirdi.

Maʼlumotlarga koʻra, vatandoshlarga norasmiy Telegram-botlar orqali ovoz berishda ishtirok etganlik uchun pul mukofotlari taklif qilinmoqda. Aslida esa fuqarolarga mablagʻ toʻlanmaydi; vazirlikka bu kabi holatlar yuzasidan yuzlab shikoyatlar kelib tushgan.

“Uchinchi shaxslar pul yoki moddiy boyliklar vaʼda qilib, loyihalar uchun ovoz toʻplaydilar, soʻngra mukofot toʻlash boʻyicha oʻz majburiyatlarini bajarmaydilar“, — deyiladi xabar matnida.

Idora rasmiy ovoz berish jarayoni faqatgina Open Budget portali, Android va iOS uchun mobil ilovalar hamda rasmiy Telegram-bot orqali amalga oshirilishini alohida taʼkidladi. Berilgan ovozlar uchun haq olinmaydi va moddiy ragʻbatlantirish koʻzda tutilmagan.

“Mukofot uchun emas, oʻzgarishlar uchun ovoz bering. Shaxsiy maʼlumotlaringizni begonalarga bermang. Firibgarlar tuzogʻiga tushib qolmang“, — deya qoʻshimcha qildi vazirlik.

Eslatib oʻtamiz, 2026-yilgi “Tashabbusli byudjet“ning birinchi mavsumi doirasidagi ovoz berish jarayoni 20-mart kuni soat 23:59 gacha davom etadi.