Navoiy viloyatida jurnalist va blogerlar uchun tashkil etilgan press-tur mobaynida viloyatdagi turizm salohiyatiga bagʻishlangan matbuot anjumani oʻtkazildi. Unda Turizmni rivojlantirish viloyat boshqarmasi vakillari hamda viloyat hokimining turizm masalalari boʻyicha maslahatchisi anjuman ishtirokchilarining savollariga atroflicha javob berdi.

Xususan, Navoiy viloyati turizmni rivojlantirish boshqarma boshligʻi Javlon Hasanov, Navbahor tumanidagi 7 ming yillik tarixga ega qoya toshlarni oʻrganishga bagʻishlangan film suratga olinishi rejalashtirilgan “Qoyadagi muhabbat” nomli film haqida maʼlumot berdi.

"Nazar tashlasangiz, Sarmishsoy darasidagi koʻhna toshlarda oʻsha zamon odamlarining turmush tarzi koʻz oldimizda gavdalanadi. Toshlarda ov qilayotgan, chorvadorlik bilan shugʻullanayotgan odamlar tasviri aks etgan. Eʼtiborlisi, ushbu petrogliflar yetti ming yillik tarixga ega.

Maqsadimiz mana shu petrogliflar - qoya toshlarni xalqqa, dunyo ahliga batafsil tanishtirish va targʻib qilishdir."

Maʼlumot uchun, film birinchi ssenariyga asosan, “Qoyadagi muhabbat” deb nomlangan va u ikki yil mobaynida germaniyalik kino ijodkorlar bilan hamkorlikda tasvirga olinishi rejalashtirilgan.

Yulduz Oʻrmonova