Energiya resurslaridan noqonuniy foydalanish holatlari fosh etildi. Bu haqida Iqtisodiy jinoyatlarga qarshi kurashish departamenti xabar berdi.

Unda aytilishicha, Bosh prokuratura huzuridagi Departamentning Zarafshon shahri boʻlimi tomonidan tergovga qadar tekshiruv oʻtkazilgan.

Unda “T.S.” MCHJ masʼul shaxslari avtotransport vositalariga xizmat koʻrsatish binosida umumiy foydalanishdagi elektr tarmogʻiga oʻzboshimchalik bilan ulanib, 311,3 mln soʻmlik elektr energiyasidan noqonuniy foydalangani fosh qilingan.

Shu kabi yana bir holat, Departamentning Buxoro tumani boʻlimi tomonidan oʻtkazilgan tergovga qadar tekshiruvda ham aniqlangan.

Unga koʻra, “S.” xususiy korxonasi rahbari Z.Sh. “Mohi Xosa” MFY hududidagi umumiy ovqatlanish shoxobchasida tabiiy gaz tarmogʻiga tijorat maqsadida oʻzboshimchalik bilan toʻgʻridan-toʻgʻri ulanib, 105,9 mln soʻmlik tabiiy gazdan noqonuniy foydalangani maʼlum boʻlgan.

Hozirda mazkur holatlar yuzasidan Jinoyat kodeksining 169-moddasi (oʻgʻrilik) bilan jinoyat ishlari qoʻzgʻatilib, tergov harakatlari oʻtkazilmoqda.