Foto: IIV Axborot xizmati

Shu kunlarda poytaxtimizda sportning Sambo va Jangovar sambo turlari boʻyicha Oʻzbekiston chempionati boʻlib oʻtmoqda.

Musobaqada Ichki ishlar vazirligi huzuridagi Jazoni ijro etish departamentining tezkor harakatlanuvchi otryadi xodimlarining bir guruhi ichki ishlar organlari shaʼnini himoya qilib, birin-ketin sovrindorlar safidan joy olishmoqda.

Xususan, birinchi boʻlib bahslarga kirishgan Departament xodimi Elyor Xojimamatov sportning sambo turi boʻyicha 88 kg vazn toifasida birinchi oʻrinni egallab, - terma jamoa safiga qabul qilindi. Shu bilan kelgusida u Osiyo va Jahon chempionati musobaqalarida ishtirok etish uchun yoʻllanmani ham qoʻlga kiritdi.

Shuningdek, sambo turi boʻyicha oʻta ogʻir vazn toifasida bel olishgan xodimimiz Beknazar Toʻraqulov faxrli 3 oʻrinni band etdi.

Shundan soʻng, jangovar sambo boʻyicha bellashuvlar boshlandi. Ushbu sportda tengsizligini namoyon etgan xodimimiz Sohib Hasanboyev 88 kg vazn toifasida oʻtkazilgan jangda chempionlikni qoʻlga kiritgan boʻlsa, 98+da janglarga kirishgan departament xodimi Islom Nosirov ham chempion boʻldi.

IIV huzuridagi JIED rahbariyati va shaxsiy tarkibi yuqori natijalarga erishib, tizim shaʼnini yuksaltirayotgan xodimlarning kelgusi faoliyatida ham omad va zafarlar yor boʻlishini tilaydi.