Xitoy hukumati O’zbekistonga 22 million AQSh dollari miqdorida grant ajratdi. Bu mablag’lar O’zbekiston Respublikasi Ichki ishlar vazirligi akademiyasida o’quv markazi yaratishga yo’naltiriladi. 

Grant mablag’lari O’zbekiston va XXR hukumatlari o’rtasida texnik-iqtisodiy hamkorlik to’g’risida imzolangan Bitim doirasida berildi. Bu haqida O’zbekiston Investitsiyalar bo’yicha davlat qo’mitasi matbuot-xizmati xabar qildi.

Qayd etilishicha, o’quv markaziga  “Ichki ishlar organlari navbatchilik qismi”, “Xavfsiz shahar”, “Tergovchining o’quv-konsultativ portali”  interaktiv dasturiy komplekslari o’rnatiladi. Shuningdek, u erga shahar va transport infratuzilmasi ob’ektlari, metro vagoni qismlari, samolyot maketlari mavjud o’quv-imitatsiya xonalaridan iborat maxsus poligon joylashtiriladi. 

Eslatib o’tamiz, davlatimiz rahbari o’tgan yil may oyida Xitoy aerokosmik ilmiy-sanoat korporatsiyasi (CASIC) rahbariyati bilan muzokaralar o’tkazgandi. O’shanda tomonlar Toshkent va O’zbekiston hududlarida “Xavfsiz shahar” videokuzatuv tizimini joriy etish bo’yicha hamkorlik qilish masalalarini ham muhokama qilgandi.