Mirzaobod tumani adliya boʻlimi tomonidan “Huquqiy avtokarvon” loyihasi doirasida “Oqoltin“ mahallasida sayyor qabul oʻtkazildi.

Tadbir davomida fuqarolarning murojaatlari oʻrganib chiqildi. Shuningdek, kiberjinoyatlarni oldini olish, yashirin iqtisodiyotga qarshi kurashish hamda yagona interaktiv davlat xizmatlari portali — my.gov.uz ning imkoniyatlari yuzasidan tushunchalar berildi.

Sayyor qabul jarayonida 10 nafar fuqaroga sanatoriyda davolanish uchun navbat olish, kredit rasmiylashtirishga taqiq qoʻyish, kadastr pasportini shakllantirish, soliq qarzdorliklari mavjud yoki mavjud emasligi toʻgʻrisida maʼlumotnoma olish hamda boshqa xizmat turlari boʻyicha sayyor davlat xizmatlari koʻrsatildi.

—Aholiga huquqiy yordamni yanada yaqinlashtirish, davlat xizmatlaridan foydalanishda qulaylik yaratishda “Huquqiy avtokarvon” loyihasi muhim ahamiyat kasb etmoqda,—deydi Sirdaryo viloyati adliya boshqarmasi masʼul xodimi Dilnoz Umrzoqova. —

Mazkur loyiha orqali adliya organlari xodimlari mahallalarga chiqib, aholi bilan ochiq muloqot oʻtkazmoqda, ularni qiynayotgan muammolar joyida oʻrganilayotir va huquqiy masalalar boʻyicha tushuntirishlar berilmoqda hamda davlat xizmatlari koʻrsatilayotir. Bu loyiha, ayniqsa, chekka va olis hududlarda yashovchi fuqarolar uchun katta qulaylik yaratmoqda.

Maʼlum qilinishicha, joriy yil boshidan buyon 50 dan ortiq mahallada “Huquqiy avtokarvon” loyihasi doirasidagi tadbirlar tashkil qilindi. Ushbu tadbirlar davomida 100 ga yaqin huquqiy muammolar aniqlanib, ularning yechimi yuzasidan amaliy yordam berildi, shuningdek, 215 nafar fuqaroga sayyor davlat xizmatlari koʻrsatildi.

Ahmadali ShERNAZAROV, “Xalq soʻzi“.