Harakatlar strategiyasidan — Taraqqiyot strategiyasi sari

19:59 13 Yanvar 2022 Jamiyat
322 0

Ayni kunlarda mamlakatimiz boʻylab, Yangi Oʻzbekistonning 2022 – 2026-yillarga moʻljallangan taraqqiyot strategiyasi va uni 2022-yilda amalga oshirish boʻyicha “yoʻl xaritasi”ni tasdiqlashga qaratilgan Oʻzbekiston Respublikasi Prezidenti Farmoni loyihasi keng jamoatchilik muhokamasidan oʻtkazilmoqda.

“Taraqqiyot strategiyasi” markazi ijrochi direktori Eldor Tulyakov Ichki ishlar vazirligi taklifiga binoan “Harakatlar strategiyasidan — Taraqqiyot strategiyasi sari” mavzuida ichi ishlar idoralari tizimida faoliyat koʻrsatayotgan xodimlar uchun taqdimot oʻtkazdi.

Taʼkidlanganidek, Yangi Oʻzbekistonning 2022 — 2026-yillarga moʻljallangan taraqqiyot strategiyasining birinchi yoʻnalishida inson qadrini yuksaltirish va erkin fuqarolik jamiyatini yanada rivojlantirish orqali xalqparvar davlat barpo etish nazarda tutilgan boʻlsa, ikkinchi yoʻnalishda esa, adolat hamda qonun ustuvorligi tamoyillarini taraqqiyotning eng asosiy va zarur shartiga aylantirish maqsad qilingan.

Shu bilan birga, mamlakatning iqtisodiy taraqqiyotini taʼminlashga qaratilgan bir qator maqsad va vazifalar uchinchi milliy iqtisodiyotni rivojlantirish, uning oʻsish surʼatlarini zamon talablari darajasida taʼminlash yoʻnalishida aks ettirilgan.

Maʼlumki, 2017 — 2021-yillarda amalga oshirilgan Harakatlar strategiyasida ijtimoiy himoyani taʼminlashga qaratilgan barcha yoʻnalishlar toʻrtinchi – ijtimoiy sohani rivojlantirishning ustuvor yoʻnalishlarida qamrab olingan boʻlsa, bu galgi Taraqqiyot strategiyasi orqali, bugungi globallashuv jarayonlaridan kelib chiqqan holda, adolatli ijtimoiy siyosat yuritish, inson kapitalini rivojlantirish hamda maʼnaviy taraqqiyotni taʼminlash, ushbu sohani tubdan isloh etish va yangi bosqichga olib chiqish kabi ikki ustuvor yoʻnalishga boʻlingan holda oʻz aksini topmoqda.

Xuddi shuningdek, Harakatlar strategiyasining beshinchi yoʻnalishida belgilab olingan chora-tadbirlar ham yangi Taraqqiyot strategiyasida umumbashariy muammolarga milliy manfaatlardan kelib chiqqan holda yechim topish hamda mamlakatimiz xavfsizligi va mudofaa salohiyatini kuchaytirish, ochiq, pragmatik va faol tashqi siyosat olib borish kabi ustuvor yoʻnalishlar sifatida belgilanmoqda.

Jumladan, Farmon loyihasining ikkinchi — Mamlakatimizda adolat va qonun ustuvorligi tamoyillarini taraqqiyotning eng asosiy va zarur shartiga aylantirish yoʻnalishida Ichki ishlar vazirligi tizimi xodimlari faoliyati bilan bogʻliq boʻlgan bir qator muhim tashabbus va takliflarni oʻzida mujassamlashtirgan maqsadlar nazarda tutilgan.

Xususan, 16-maqsadda jamoat tartibini saqlash va xavfsizlikni taʼminlash, huquqbuzarliklarning sodir etilishiga sabab boʻlgan shart-sharoitlarni oʻz vaqtida aniqlash va bartaraf etishning samarali tizimini yaratish orqali jamoat tartibini saqlash boʻyicha patrullik xizmati faoliyatini sifat jihatidan yangi bosqichga koʻtarish, shu jumladan zamonaviy axborot texnologiyalarini joriy etgan holda fuqaroni ichki ishlar boʻlimiga tekshirish uchun olib borish tartibini bekor qilish nazarda tutilgan.

Shuningdek, yoʻl infratuzilmasini takomillashtirish va xavfsiz harakatlanish sharoitlarini yaratish orqali yoʻllarda oʻlim holatlarini qisqartirish, jumladan harakatni boshqarish tizimini toʻliq raqamlashtirish va jamoatchilikning ushbu sohadagi ishlarda keng ishtirokini taʼminlash belgilangan.

Yana bir 17-maqsadda nazarda tutilgan chora-tadbirlarning hayotga tatbiq etilishi orqali esa, huquqni muhofaza qiluvchi organlarning yangi qiyofasi shakllantirilib, ularning faoliyati xalq manfaatlari, qadr-qimmati, huquq va erkinliklarini samarali himoya qilishga xizmat qilishga yoʻnaltirish belgilanmoqda. Bunda ichki ishlar organlari, avvalo xalqning ishonchli himoyachisi sifatida xalqchil professional tuzilmaga aylantirilib, aholi bilan maqsadli ishlashga yoʻnaltiriladi.

Taqdimot yakunida ishtirokchilar tomonidan loyihaga fikr hamda takliflar bildirildi.

“Xalq soʻzi”.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?