Respublika ixtisoslashtirilgan onkologiya va tibbiy radiologiya ilmiy-amaliy tibbiyot markazi boʻlim mudiri Lola Alimxoʻjayeva bu haqda oʻz fikrlarini bildirdi.

— “Aholiga gematologiya va onkologiya xizmatlarini koʻrsatish tizimini yanada takomillashtirish toʻgʻrisida”gi Prezident qarorida mamlakatimiz boʻylab 45-65 yoshdagi ayollar koʻkrak bezi saratoni skriningidan oʻtkazilishi belgilangan.

Maʼlumotlarga koʻra, Oʻzbekistonda ushbu yosh toifasidagi 3 millionga yaqin ayol istiqomat qiladi.

Bu xastalikning tarqalish koʻrsatkichi har 100 ming nafar aholiga nisbatan 12 nafarni tashkil etadi. 2021-yilda koʻkrak bezi saratoni 4164 nafar opa-singillarimizda birlamchi aniqlangan boʻlib, 62 foizida kasallikning erta — 1-2 bosqichlari kuzatilgan.

Bu bosqichlarda 10 tadan 9 ta holatda xastalikdan xalos boʻlish imkoni boʻladi.

Kelajakda keng koʻlamli skrining tadbirlari yordamida har yili 1,5 millionga yaqin ayollarni mammografik tekshiruvdan oʻtkazish rejalashtirilgan.

Bu borada mobil va statsionar mammografiya komplekslariga tayanamiz.