Birlashgan Millatlar Tashkiloti Bolalar jamgʻarmasi (UNICEF) hisob-kitobicha, Isroilning Gʻazo sektoridagi amaliyoti boshlangandan beri 17 ming bola ota-onasiz qolgan yoki oilasidan ajralgan. Hududdagi, deyarli, barcha bolalar ruhiy salomatlik yordamiga muhtoj.

— Har bir bolaning hijron va qaygʻuga toʻla, yurakni ezuvchi hikoyasi bor, — dedi UNICEFning Falastin boʻyicha vakili Jonatan Kriks Jenevada boʻlib oʻtgan matbuot brifingi chogʻida. — Bu koʻrsatkich jami koʻchirilgan aholining 1 foiziga toʻgʻri keladi. Bolalarning shaxsini aniqlash juda qiyin, chunki yaralangan yoki jarohatlangan holda kasalxonaga keltirilganlar, hatto, ismini ham ayta olmaydi. Mojaro payti ota-onasidan ayrilgan bolani biror oila boqib olishi odatiy hol. Zero, Gʻazoda oziq-ovqat, suv yoki boshpana yetishmovchiligi tufayli koʻplab oilalarning oʻzlari mushkul ahvolda. Bolalarning bu mojaroga aloqasi yoʻq. Shunga qaramay, ular ayanchli azob chekmoqda.

Mulozimning soʻzlariga koʻra, Gʻazodagi bolalarning ruhiy holati jiddiy ziyon koʻrmoqda.