Foto: Tashqi ishlar vazirligi matbuot xizmati

2022-yil 1-dekabr kuni Oʻzbekiston Tashqi ishlar vazirligida vazirning birinchi oʻrinbosari Furqat Sidiqov Hindistonning mamlakatimizdagi Favqulodda va Muxtor Elchisi Manish Prabxat bilan uchrashdi.

Muloqotda oliy darajada erishilgan kelishuvlarning amalga oshirilishi, shuningdek, Oʻzbekiston-Hindiston savdo-iqtisodiy hamkorligini rivojlantirish istiqbollari muhokama qilindi.

Tomonlar toʻqimachilik sanoati, farmatsevtika, sogʻliqni saqlash, axborot texnologiyalari, banklararo hamkorlik va boshqa sohalarda ikki tomonlama hamkorlikni rivojlantirishning amaliy jihatlarini koʻrib chiqdilar.

Mazkur masalalar yuzasidan Oʻzbekiston va Hindistonning tegishli kompaniya va tashkilotlari oʻrtasida yanada batafsil muzokaralar tashkil etish boʻyicha kelishuvga erishildi.

Eksport turlarini kengaytirish, ijtimoiy rivojlantirish qoʻshma loyihalarini amalga oshirish masalalari alohida muhokama qilindi.

Ikki tomonlama munosabatlarda ishbilarmonlik muhitini yanada rivojlantirish, yangi oʻzaro manfaatli va istiqbolli loyihalarni ishlab chiqishga oʻzaro tayyorlik tasdiqlandi.