Oliy Majlis Qonunchilik palatasining navbatdagi majlisida bir guruh deputatlar tomonidan qonunchilik tashabbusi huquqi asosida ishlab chiqilgan — “Oʻzbekiston Respublikasining ayrim qonun hujjatlariga saylov va referendum oʻtkazish tartibini yanada takomillashtirishga qaratilgan oʻzgartirish va qoʻshimchalar kiritish toʻgʻrisida”gi Oʻzbekiston Respublikasi Konstitutsiyaviy qonuni loyihasi birinchi oʻqishda konseptual jihatdan koʻrib chiqilmoqda.

Ayrim deputatlar ushbu qonun loyihasi yuzasidan oʻz fikr-mulohazalarini bildirmoqda.

“Adolat” sotsial-demokratik partiyasining Qonunchilik palatasidagi fraksiyasi rahbari Zuhra Ibragimova soʻz olib, siyosiy partiyadan koʻrsatilgan va Qonunchilik palatasiga saylangan deputat faqat shu partiya fraksiyasining aʼzosi boʻlishi qatʼiy belgilanayotgani siyosiy partiyalarning parlamentdagi roli va oʻrni oshishiga xizmat qilishini alohida eʼtirof etdi.

Shuningdek, fraksiya rahbari partiya roʻyxatini shakllantirishda har uchta nomzodning bir nafari ayol kishi boʻlishi lozimligi haqidagi normaning belgilanayotganini qoʻllab-quvvatladi hamda deputatlarni mazkur qonun loyihasini konseptual jihatdan qoʻllab-quvvatlashga chaqirdi.