Joriy yilning 9 oyida yurtimizdagi mahalliy farmatsevtika korxonalari tomonidan qiymati 1,86 trln. soʻmlik farmatsevtika mahsulotlari ishlab chiqarilib, 113,4 foizlik oʻsish koʻrsatkichlari taʼminlandi.

Bu haqda Sogʻliqni saqlash vazirligi hamda Farmatsevtika tarmogʻini rivojlantirish agentligi tomonidan oʻtkazilgan matbuot anjumanida maʼlum qilindi. 

Agentlik direktori oʻrinbosari Alisher Temirovning qayd etishicha, Investitsiya dasturining 29 ta loyihasi doirasida 500,9 mlrd. soʻm, jumladan, 18,6 mln. dollar miqdorida xorijiy investitsiya mablagʻlari oʻzlashtirildi.

Sohada qiymati 244,7 mlrd. soʻmga teng 6 ta yirik ishlab chiqarish loyihasi ishga tushirilishi 252 ta yangi ish oʻrni yaratilishiga asos boʻldi.

Yana yutuqlardan biri — 9 oy davomida farmatsevtika sohasida 48,05 mln. dollarlik mahsulot eksporti amalga oshirilganidir. Bu rejalashtirilgan koʻrsatkichlarga nisbatan 121,7 foizni tashkil etadi.