Foto: «Халқ сўзи»

Fargʻona shahrida Koreya xalqaro hamkorlik agentligi – KOICA bilan sheriklikda tashkil etilgan kasb-hunarga oʻqitish markazi tantanali ravishda foydalanishga topshirildi.

Tadbirda Fargʻona viloyati hokimi Xayrullo Bozorov, Koreya Respublikasining mamlakatimizdagi Favqulodda va muxtor elchisi Kim Xi Sang, bandlik va mehnat munosabatlari vazirining birinchi oʻrinbosari Erkin Muhitdinov, Koreya xalqaro hamkorlik agentligining Oʻzbekistondagi ofisi direktori Pak Sunjin, viloyatda faoliyat olib borayotgan Koreya kompaniyalari rahbarlari hamda keng jamoatchilik vakillari qatnashdi.

Vazirlar Mahkamasining “Oʻzbekiston Respublikasida ishsiz fuqarolarni kasb-hunarga oʻqitish markazlarini tashkil etish chora-tadbirlari toʻgʻrisida”gi qarori asosida Koreya xalqaro hamkorlik agentligi tomonidan 9 million 320 ming dollar miqdorida investitsiya kiritilib, zamonaviy oʻquv binosi, yotoqxona, oshxona va sport zalidan iborat majmua barpo etildi. Markazga barcha zamonaviy uskuna va jihozlar Janubiy Koreyadan olib kelindi. Oʻquv mashgʻulotlari ham Koreya dasturi va qoʻllanmalari asosida olib boriladi.

Markazda 5 ta – elektronika, axborot texnologiyalari, avtomobilsozlik, tikuvchilik va kosmetologiya taʼlim yoʻnalishlarida mutaxassislar tayyorlanadi. Oʻquv markazida bir yilda 6-8 oylik kurslarda qariyb 500 nafar ishsiz fuqaro kasbga oʻqitiladi.

Yangi markaz Fargʻona vodiysi viloyatlari aholisiga xizmat koʻrsatishi rejalashtirilgan.

Botir Madiyorov, “Xalq soʻzi”.