Foto: Xalq so‘zi

Shu yilning 25-yanvar — 4-fevral kunlari Fargʻonada joriy yilgi futbol mavsumining ilk musobaqasi — “Fargʻona viloyati hokimi kubogi” oʻyinlari oʻtkaziladi.

Bu yil turnirda 4 ta mezbon jamoa, Andijon va Namangan viloyatidan 2 tadan, Toshkent shahridan 2 ta, Jizzaxdan bitta futbol klubi ishtirok etadi. Shuningdek, qoʻshni Tojikiston Respublikasining “Xoʻjand” jamoasi musobaqada qatnashish istagini bildirgan boʻlsa, Qirgʻizistondan yana bir futbol klubining ishtirok etishiga aniqlik kiritilmoqda.

— Musobaqani tashkil etish uchun barcha tashkiliy masalalar hal etilgan, — deydi Fargʻona viloyati futbol assotsiatsiyasi mutaxassisi Hakimjon Fayziyev. — Oʻyinlar kuniga ikki marotaba — Fargʻona va Quvasoy shahridagi stadionlarda boʻlib oʻtadi. Bahslarni vodiylik hakamlar boshqarishi rejalashtirilgan.

Ishonamizki, ushbu turnir har yilgidek futbol mavsumi oldidan jamoalarga oʻziga xos tayyorgarlik vazifasini bajaradi.

Botir Madiyorov, “Xalq soʻzi”.